Për ditën e shtunë, datë 6 qershor 2026, vendi ynë do të ndikohet nga kushte të qëndrueshme atmosferike. Paraditja do të karakterizohet nga intervale të gjata me diell, veçanërisht përgjatë zonave bregdetare dhe të ulëta. Në zonat malore, moti do të shoqërohet me alternime kthjellimesh dhe vranësirash kalimtare.
Gjatë orëve të pasdites, situata meteorologjike do të vijojë me kthjellime dhe vranësira të herëpashershme në të gjithë territorin, pa shfaqje të reshjeve të shiut. Temperaturat e ajrit do të shënojnë rritje, duke regjistruar vlerën minimale prej 12°C në qytetin e Ersekës, ndërsa temperaturat maksimale në vend do të shkojnë deri në 34°C.
Era do të fryjë me drejtim nga juglindja në jugperëndim, me një shpejtësi mesatare prej 6 m/s. Në detet Adriatik dhe Jon, valëzimi do të jetë i forcës 2-4 ballë.