Ditën e enjte, 26 mars 2026, Shqipëria ndikohet nga kushte atmosferike të paqëndrueshme. Moti parashikohet me alternime kthjellimesh dhe vranësira që gradualisht shtohen, ndërsa në mbrëmje bëhet kryesisht i vranët.
Reshjet e shiut fillojnë në orët e mëngjesit në ekstremin verior me intensitet të ulët. Pas orëve të mesditës dhe kryesisht pasdite, ato shtrihen në pjesën më të madhe të vendit, me intensitet kryesisht të ulët. Në mbrëmje, përgjatë zonave bregdetare dhe ultësirës perëndimore, reshjet fitojnë intensitet deri mesatar, hera-herës në formë shtrëngatash afatshkurtra.
Në zonën e Alpeve, në verilindje, lindje dhe juglindje, në lartësitë mbi 900-1000 metra, parashihen reshje dëbore me intensitet të ulët deri mesatar. Në Alpe dhe relievet e larta malore, në periudha afatshkurtra, mund të ketë stuhi dëbore.
Era fryn me drejtim juglindje-jugperëndim, me shpejtësi mesatare 9 m/s, ndërsa hera-herës arrin deri në 18 m/s. Valëzimi në Detin Adriatik dhe Jon do të jetë i forcës 3-6 ballë.