Parlamenti Europian miratoi më 26 mars 2026 rregulla të reja për shtrëngimin e politikës së imigracionit në Bashkimin Evropian, duke u përqendruar te kthimet e migrantëve të parregullt.
Kryeministrja italiane Giorgia Meloni reagoi në rrjetet sociale, duke e cilësuar vendimin si hap të rëndësishëm. Ajo shkroi: “Parlamenti Europian u ka dhënë dritën jeshile rregullave të reja për kthimet: Evropa më në fund po lëviz në drejtimin e duhur, në një rrugë që Italia e ka mbështetur fuqimisht”.
Sipas Melonit, qendrat e kthimit rrisin shanset për gjetjen e vendit të kthimit për migrantët e parregullt, duke përfshirë jo vetëm vendet e origjinës, por edhe vende të treta. Këto masa synojnë rritjen e efektivitetit të kthimeve, forcimin e kontrollit kufitar dhe ndërtimin e një politike më të besueshme migracioni për BE-në.
Vendimi lidhet me modelin italian në Shqipëri, ku janë ngritur dy qendra për përpunimin e emigrantëve. Njëra prej tyre është funksionale, ndonëse projekti ka hasur pengesa për shkak të vendimeve gjyqësore. Skema ka tërhequr vëmendjen e vendeve të tjera të Bashkimit Evropian dhe të Mbretërisë së Bashkuar, e cila hoqi dorë nga plani për dërgimin e emigrantëve në Ruandë.