Parlamenti Evropian ka miratuar përfundimisht rregulloren e re që ashpërson masat për kthimin e shtetasve të vendeve të treta, të cilët qëndrojnë në mënyrë të parregullt në territorin e Bashkimit Evropian. Nisma, e mbështetur nga Partia Popullore Evropiane dhe forcat e djathta, synon të thjeshtojë dhe përshpejtojë procedurat e riatdhesimit.
Sipas rregullave të miratuara, vendimi për kthim detyron individët të lënë territorin e shtetit anëtar menjëherë ose brenda një afati të caktuar. Një element kyç i rregullores është mundësia e transferimit të emigrantëve, përjashtuar të miturit e pashoqëruar, drejt qendrave të kthimit të vendosura jashtë kufijve të unionit. Gjithashtu, personat mund të mbahen në qendrat e ndalimit për një periudhë deri në 24 muaj.
Kryeministrja e Italisë, Giorgia Meloni, e cila ndodhet në Evian për samitin e G7, e vlerësoi këtë vendim si një arritje historike për Italinë dhe Bashkimin Evropian. Ajo theksoi se rregullorja përqafon qasjen e vendosur nga qeveria italiane përmes protokollit me Shqipërinë për qendrat e pritjes në Shëngjin dhe Gjadër.
Sipas Meloni-t, kjo masë do të mundësojë mbrojtjen më efektive të kufijve, uljen e numrit të zbarkimeve dhe luftën kundër rrjeteve të trafikimit të qenieve njerëzore. Ajo shtoi se ky sukses konfirmon orientimin e qeverisë së saj për të zbatuar programin e votuar nga qytetarët italianë, duke e shndërruar modelin e bashkëpunimit me Shqipërinë në një instrument në dispozicion të të gjitha vendeve anëtare të BE-së.