Partia Demokratike e Shqipërisë ka deklaruar se janë hequr sanksionet që i ndalonin hyrjen në territorin amerikan kryetarit të saj, Sali Berisha. Ndonëse Berisha pohoi se ka pasur një komunikim zyrtar lidhur me këtë zhvillim, ai nuk dha detaje shtesë mbi burimin e informacionit dhe as nëse vendimi përfshin anëtarët e familjes së tij, të cilët u përfshinë në masën e vitit 2021.
Në një prononcim për gazetarët, Sali Berisha deklaroi: “Unë erdha, u krye”, duke theksuar se çështja e vizës nuk duhet ngatërruar me terminologjinë e përdorur nga kundërshtarët politikë. Nga ana tjetër, Departamenti amerikan i Shtetit (DASH) dhe Ambasada e SHBA në Tiranë nuk kanë bërë ende asnjë njoftim publik për ndryshim të këtij statusi.
Sanksionet fillestare u vendosën në maj të 2021 nga sekretari i atëhershëm i Shtetit, Antony Blinken, bazuar në seksionin 7031(c) të legjislacionit amerikan. Sipas DASH, ish-kryeministrit iu ndalua hyrja në SHBA për përfshirje në veprime korruptive, si shpërdorim i fondeve publike dhe ndërhyrje në proceset publike për pasurimin e aleatëve politikë dhe anëtarëve të familjes: Liri Berisha, Shkëlzen Berisha dhe Argita Berisha Malltezi.
Lidhur me këto zhvillime, ka reaguar edhe kreu i grupit parlamentar të Partisë Socialiste, Taulant Balla, i cili vuri në dukje bazën ligjore të vendimit të vitit 2021.