Departamenti Amerikan i Shtetit ka njoftuar heqjen e statusit "non grata" për kryetarin e Partisë Demokratike, Sali Berisha. Vendimi, i cili i hap rrugën mundësisë së hyrjes së tij në Shtetet e Bashkuara të Amerikës, u është bërë i ditur liderit të opozitës në një bisedë telefonike 15-minutëshe nga e ngarkuara me punë e SHBA-së në Tiranë, Nancy Van Horn.
Lajmi është konfirmuar nga vetë Sali Berisha, i cili gjatë hyrjes në sallën e Kuvendit u prit me duartrokitje nga deputetët e grupit parlamentar të Partisë Demokratike. Në një prononcim të shkurtër, ai u shpreh me frazën "Unë erdha, u krye", duke konfirmuar kështu heqjen e masës kufizuese.
Sanksioni ishte vendosur më 19 maj 2021, kur ish-sekretari i Shtetit, Antony Blinken, e shpalli Berishën dhe familjen e tij "non grata". Në atë kohë, arsyetimi zyrtar nga autoritetet amerikane lidhej me pretendime për përfshirje në veprime korruptive, shpërdorim të fondeve publike dhe ndërhyrje në proceset e pavarura të drejtësisë. Gjatë pesë viteve të fundit, këto akuza janë mohuar vazhdimisht nga kreu i PD-së.
Ndërkohë, institucionet zyrtare amerikane nuk kanë publikuar ende një reagim zyrtar për këtë vendim. Ndërsa sanksioni nga SHBA-ja është hequr, për Sali Berishën mbetet ende në fuqi masa e ndalimit të hyrjes nga ana e Mbretërisë së Bashkuar.