Sali Berisha, kryetar i Partisë Demokratike, paraqitet këtë të hënë, më 2 mars 2026, në Prokurorinë e Posaçme Kundër Korrupsionit dhe Krimit të Organizuar (SPAK), në zbatim të masës së sigurimit "detyrim paraqitje".
Berisha u prit para ambienteve të SPAK-ut nga një grup mbështetësish, deputetësh të PD-së, përfaqësuesish të opozitës dhe qytetarësh. Ai i përshëndeti të pranishmit.
Kreu i PD-së paraqitet në SPAK të hënën e parë dhe të tretë të çdo muaji. Kjo masë lidhet me dosjen Partizani, ku ish-kryeministri Berisha akuzohet për korrupsion pasiv. Dhëndri i tij, Jamarbër Malltezi, dhe biznesmeni Fatmir Bektashi akuzohen për korrupsion dhe pastrim parash.
Berisha deklaroi se vendimi i Apelit të Posaçëm për këtë masë përbën krim kushtetues. Sipas tij, prokurorët e SPAK-ut kanë kërkuar masa sigurie kundër tij me arsyetimin se ai sulmon Prokurorinë e Posaçme dhe gjykatën.
Ish-kryeministri u lirua më 27 nëntor 2024, pas rreth një viti në arrest shtëpiak për të njëjtat akuzë.
Përditësime
Sali Berisha u pyet nga SPAK për sulmin me molotov ndaj Vilës 31 gjatë protestës së opozitës të së shtunës. Ai refuzoi të komentojë temën para prokurorëve dhe premtoi përgjigje në selinë e PD-së.
"Nuk do ta keqpërdor këtë tribunë... për Altin Troplinin dhe Irenën me 5 mbiemra," deklaroi ai.