Sali Berisha, kryetar i Partisë Demokratike, paraqitet këtë të hënë në Prokurorinë e Posaçme kundër Korrupsionit dhe Krimit të Organizuar (SPAK), në zbatim të masës së sigurisë detyrim paraqitje, në kuadër të dosjes hetimore për ish-kompleksin sportiv Partizani.
Ai shoqërohet nga avokati i tij, Genc Gjokutaj. Jashtë ambienteve të SPAK-ut, Berisha u prit nga mbështetës dhe militantë të opozitës, me të cilët u përshëndet.
Akuzat kundër Berishës dhe të tjerëve
Sipas SPAK-ut, Berisha akuzohet se, në cilësinë e kryeministrit të kohës, ka ndërmarrë veprime konkrete në miratim ligjesh dhe aktesh nënligjore, ku përfitues ishte dhëndri i tij, Jamarbër Malltezi, për ndërtimin e pallateve në truallin e ish-kompleksit sportiv Partizani.
Malltezi ndodhet nën akuzë për korrupsion dhe pastrim parash. Prokuroria vlerëson se ai ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt, falë vendimeve të qeverisë të marra nga vjehrri i tij.
Ndër të pandehurit e tjerë përmenden Fatmir Bektashi, i akuzuar për korrupsion dhe veprime të paligjshme lidhur me pastrimin e parave, si dhe Xhimi Begeja, ortak i Malltezit, dhe Andia Pustina, financiere në kompaninë “Homeplan”, të cilët akuzohen për përfshirje në skema të pastrimit të parave.
Deklaratat e Berishës
Para mediat, Berisha kritikoi sistemin e drejtësisë, duke theksuar se 200 mijë dosje ende nuk janë gjykuar dhe se disa qytetarë presin prej 15 vitesh për përfundimin e proceseve. Ai akuzoi ish-kreun e SPAK-ut, Altin Dumani, si person të përfshirë në afera korruptive.