Kryeministri Edi Rama, së bashku me anëtarë të Këshillit të Ministrave, do të marrin pjesë në mbledhjen e Grupit Parlamentar të Partisë Socialiste, e cila do të mbahet paraditen e së shtunës në Pallatin e Brigadave. Kjo mbledhje shënon rikthimin e konsultimeve të rregullta të socialistëve, të cilat nuk janë zhvilluar që nga muaji prill.
Sipas agjendës, takimi do të hapet nga kreu i grupit, Taulant Balla, ndërsa temat kryesore të diskutimit përfshijnë:
• Konkluzionet e Konferencës së 8-të Ndërqeveritare mes Shqipërisë dhe Bashkimit Evropian.
• Ecuria e negociatave për anëtarësim dhe paketa e ligjeve përkatëse.
• Informimi mbi procedurat e ndjekura për investimet në Zvërnec dhe zhvillimin turistik në Sazan.
• Ecuria e reformës territoriale nga bashkëkryetari i Komisionit të Reformës Administrative, Arbjan Mazniku.
Deputetët do të kenë në dispozicion nga 2 minuta për pyetje dhe diskutime. Në pjesën e dytë parashikohet informimi mbi performancën e anëtarëve të grupit dhe përmbyllja me fjalimet e Edi Ramës dhe Taulant Ballës.
Takimi zhvillohet në një moment delikat për mazhorancën, pas 19 ditësh protestash qytetare që kanë kundërshtuar projektin në Zvërnec. Vëmendja është përqendruar gjithashtu te zhvillimet e brendshme të Partisë Socialiste, pas largimit të deputetes Martjana Koçeku nga radhët e partisë dhe qëndrimeve kritike të shprehura së fundmi nga deputetja Elisa Spiropali.
Përditësime
Partia Socialiste ka nisur mbledhjen e grupit parlamentar në orën 10:00. Takimi, pjesë e axhendës së rregullt mujore, do të fokusohet në vlerësimin e performancës së deputetëve dhe monitorimin e zbatimit të detyrave të lëna më parë.
Partia Socialiste konfirmoi zhvillimin e mbledhjes së grupit parlamentar më 20 qershor, ora 10:00. Në takim do të marrin pjesë edhe ministrat e kabinetit qeveritar. Ndërkohë, organizatorët zgjatën kohëzgjatjen e protestave në 20 ditë, nga 19 ditë sa ishte raportuar më parë.