FK Partizani ka njoftuar të enjten, më 30 prill 2026, mbylljen e bashkëpunimit me trajnerin Oltion Kërnaja. Vendimi erdhi pas rezultateve të fundit të ekipit, ku skuadra regjistroi 3 humbje dhe 3 barazime në 6 ndeshjet e fundit.
Humbja 2-1 në derbin e së shtunës së kaluar kundër Tiranës ishte vendimtare. Kjo ishte ndeshja e dytë e humbur në derbi brenda sezonit, çka çoi në shkarkimin e dytë të një trajneri te Partizani. Me 45 pikë, ekipi mban vendin e pestë në Superligë, me pikë të barabarta me Dinamon, që është një pozicion më sipër. Të dyja skuadrat garojnë ende për një vend në Final 4, me tre ndeshje të mbetura nga fundi i sezonit. Ndeshja e fundit e Partizanit (java 36) do të jetë kundër Dinamos.
Në njoftimin zyrtar, klubi shpjegon se largimi i Kërnajës erdhi për shkak të rezultateve që kompromentuan objektivat sezonalë. Për pjesën e mbetur të edicionit, ekipin do ta drejtojë stafi teknik aktual, pjesë e të cilit është drejtori sportiv Agim Ibraimi.
Oltion Kërnaja, 37-vjeçar nga Tropoja, u ul në stolin e Partizanit më 7 tetor 2025. Ai drejtoi skuadrën në 28 ndeshje, duke siguruar 13 fitore, 7 barazime dhe 8 humbje. Para tij, trajneri Mladen Milinkovic u shkarkua pas humbjes 0-3 në derbin e parë të sezonit, pas javës së gjashtë. Kërnaja kishte qenë ndihmësi i Milinkovic-it deri në atë moment.