Partia Demokratike ka nisur përgatitjet për zgjedhjet në strukturat e degëve dhe në qendër. Selia blu ka ndarë udhëzimet për procesin zgjedhor dhe organizativ, të firmosura nga kryetari Sali Berisha dhe Sekretari i Përgjithshëm Flamur Noka. Ky vendim mban datën 17 mars 2026 dhe lidhet me përfundimin e afatit katërvjeçar të organeve drejtuese në maj 2026, duke bërë të nevojshëm rinovimin statutor.
Udhëzimi kërkon zhvillimin e zgjedhjeve brenda 30 prill 2026 në të gjitha nivelet e strukturave vendore, duke përfshirë kryetarët, nënkryetarët, sekretarët e seksioneve, grupseksionet, kryetarët e degëve dhe kryesitë e degëve. Procesi duhet të jetë i rregullt, transparent dhe në përputhje me parimet e Statutit për zgjedhje të lira, të fshehta dhe demokratike.
Sipas Vendimit të Kryesisë nr 35 të datës 17.03.2026 mbi proceset zgjedhore dhe organizative të PDSH, strukturat vendore zbatojnë Udhëzimin nr 2 dhe nr 3 të datës 27.03.2026 të Sekretarit të Përgjithshëm. Këto udhëzime trajtojnë mbajtjen e procesit zgjedhor në nivelet vendore dhe propozimin si dhe zgjedhjen e anëtarëve të kryesisë së degës.
Strukturat drejtuese duhet të fillojnë menjëherë punën, të raportojnë progresin sipas përcaktimeve dhe të respektojnë me rigorozitet afatet kohore. Më 23 maj 2026 mbahet Kuvendi për zgjedhjen e kryetarit të partisë.
Ky proces zhvillohet në kontekstin e protestave të opozitës kundër qeverisë, ku kërkohet dorëheqja e kryeministrit Edi Rama dhe formimi i një qeverie teknike për zgjedhje të reja, pas akuzave për skandale korruptive, përfshirë ato lidhur me ish-zv.kryeministren Belinda Balluku dhe dosjen e AKSHI-t.