Partia Demokratike do të zhvillojë sot, më 22 mars 2026, në orën 18:00, tubimin para Kryeministrisë në Tiranë, si pjesë e aksionit opozitar kundër qeverisë.
Në fokus të protestës janë kërkesat për largimin e kryeministrit Edi Rama, krijimin e një qeverie teknike dhe garantimin e zgjedhjeve të lira e të ndershme. Kreu i opozitës, Sali Berisha, u bëri thirrje qytetarëve për pjesëmarrje masive. Tubimi përkon me festën e Sulltan Novruzit dhe lidhet me datën historike të 22 marsit 1992, ditën e fitores së Partisë Demokratike në zgjedhjet e para pluraliste.
Masat e Policisë së Tiranës
Policia e Tiranës ka ndërmarrë masa për garantimin e rendit publik, në zbatim të ligjit "Për tubimet". Do të ketë kufizime në lëvizjen e automjeteve në akse të caktuara rrugore:
- Nga ora 09:30 deri në përfundim të tubimit: bllokim i Bulevardit Dëshmorët e Kombit, nga Ura deri në kryqëzimin me rrugën Ismail Qemali;
- Nga ora 15:00 deri në përfundim të tubimit: bllokim i rrugëve Ukraina e Lirë, Papa Gjon Pali II dhe Ismail Qemali.
Në varësi të zhvillimit të tubimit, mund të ketë kufizime edhe në akse të tjera. Policia ka parashikuar devijime në rrugë alternative për qarkullimin e automjeteve.
Autoritetet kërkojnë mirëkuptimin e qytetarëve për këto masa të përkohshme dhe apelojnë të distancohen nga veprimet e kundërligjshme që cenojnë rendin dhe sigurinë publike.
Përditësime
PD konfirmoi se protesta e sotme nuk do të ketë podium apo fjalime nga eksponentët politikë.
- Itinerari nuk kufizohet vetëm para Kryeministrisë; detajet në diskutim.
- Policia e Shtetit angazhon 1500 efektivë për rendin dhe sigurinë.
Sali Berisha doli rreth orës 18:40 nga selia e PD-së për të marshuar drejt Kryeministrisë bashkë me deputetë dhe mbështetës.
Protestuesit hodhën molotovë, fishekzjarrë dhe lëndë piroteknike drejt godinës së Kryeministrisë, duke shkaktuar tym dhe flakë. Policia përgjigjur me gaz lotsjellës dhe autobote me ujë për të shpërndarë turmën.
Turmat janë mbledhur në Bulevardin Dëshmorët e Kombit, pranë Piramidës dhe selisë së PD-së.