Partia Demokratike e Shqipërisë ka njoftuar Policinë e Tiranës për zhvillimin e një tubimi ditën e nesërme në orën 17:00 para godinës së Kryeministrisë. Policia e Tiranës ka ndërmarrë masa për garantimin e rendit publik, zbatimin e ligjit “Për tubimet”, mbrojtjen e të drejtave të qytetarëve dhe të pronës publike e private.
Masat për kufizimin e lëvizjes
Për mbarëvajtjen e tubimit, do të kufizohet lëvizja në disa akse rrugore:
• Nga ora 23:45 e ditës së sotme, bllokohet lëvizja dhe parkimi i automjeteve në bulevardin “Dëshmorët e Kombit”, nga “Ura e Dajtit” deri në rrugën “Ismail Qemali”, deri në përfundim të tubimit.
• Nesër nga ora 15:00 deri në përfundim të tubimit, bllokohet lëvizja në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Në varësi të zhvillimit të tubimit, mund të ketë kufizime të tjera në akse rrugore. Policia e Tiranës ka parashikuar devijime në rrugë alternative për të ndihmuar qytetarët që shmangin zonat e bllokuara.
Apeli për qytetarët
Policia e Tiranës u kërkon qytetarëve të shmangin lëvizjen me automjete në akset e mbyllura dhe të përdorin rrugë alternative. Duke iu referuar disa deklaratave publike, autoritetet i ftojnë qytetarët të distancohen nga çdo veprim i paligjshëm që cenon rendin dhe sigurinë publike. Çdo shkelje do të trajtohet sipas ligjit.
Përditësime
Pamjet me dron tregojnë pjesëmarrje të ulët në protestën e Partisë Demokratike (PD) para Kryeministrisë: vetëm një grusht vetësh. Protesta vijon foltoret javore të PD-së me pjesëmarrje të zvogëluar. Në shesh kanë mbetur kryesisht besnikët e strukturave partiake, pavarësisht retorikës së Sali Berishës për përmbysjen e qeverisë Edi Rama.
Sali Berisha ka thirrur qytetarët nga e gjithë Shqipëria për një 'protestë kombëtare'.
Organizatorët presin pjesëmarrje të madhe për 'arsye madhore që lidhen me keqqeverisjen'.
500 protestues nga degët lokale të juglindjes, si Korça, do të udhëtojnë me makina personale për të shmangur identifikimin policor.
Policia ka vendosur postbllok në dalje të Korçës për të kontrolluar mjetet personale për lëndë piroteknike.
PD kërkon dorëheqjen e Kryeministrit Edi Rama dhe Taulant Ballukut.