Partia Demokratike e Kosovës (PDK) reagoi pas paraqitjes së fjalëve përfundimtare në Dhomat e Specializuara në Hagë nga Hashim Thaçi, Kadri Veseli, Jakup Krasniqi dhe Rexhep Selimi, ish-krerë të Ushtrisë Çlirimtare të Kosovës (UÇK).
PDK bën të ditur se ka përcjellë me vëmendje këtë fazë të procesit gjyqësor. Sipas deklaratës së partisë, paraqitja e të akuzuarve ishte dinjitoze dhe e mbështetur në të vërtetën e luftës së popullit të Kosovës për liri. Pas më shumë se pesë vjetësh në paraburgim, ata folën me përgjegjësi dhe respekt për procesin, duke dëshmuar se përballja me drejtësinë është pjesë e historisë.
Partia kërkon që vendimi i gjykatës të jetë i drejtë, i paanshëm dhe i bazuar ekskluzivisht në fakte dhe prova, larg çdo narrative ose perceptimi politik. PDK e cilëson luftën e popullit të Kosovës si të drejtë, çlirimtare dhe të domosdoshme për mbijetesë përballë një regjimi shtypës. Kjo e vërtetë historike është njohur nga qytetarët dhe konfirmuar nga zhvillimet ndërkombëtare që çuan në ndërhyrjen e NATO-s dhe shpalljen e pavarësisë së Kosovës.
PDK shprehet e bindur për pafajësinë e Hashim Thaçit, Kadri Veselit, Jakup Krasniqit dhe Rexhep Selimit. Ajo pret një vendim pa zvarritje që do të konfirmojë lirimin e plotë nga të gjitha pikat e aktakuzës.
Në deklaratë, partia rithekson solidaritetin me familjet e ish-krerëve të UÇK-së, falënderon qytetarët për mbështetjen përmes marshimeve dhe protestave, si dhe shpreh mirënjohje për mediat për profesionalizmin gjatë procesit.