Gjykata Speciale në Hagë konfirmoi zgjatjen e afatit për shpalljen e aktgjykimit ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi. Afati u zgjat për 60 ditë deri të hënën, më 20 korrik 2026, për shkak të kompleksitetit të çështjes.
Në njoftimin e Dhomave të Specializuara thuhet se kjo datë nuk është data e shpalljes së aktgjykimit, por vetëm afati i zgjatur. Paneli Gjyqësor shtoi se, nëse një zgjatje tjetër bëhet e nevojshme, do të nxjerrë një urdhër në kohën e duhur.
Ish-krerët e UÇK-së kanë mbajtur deklaratat përfundimtare më 18 shkurt dhe janë deklaruar të pafajshëm për të gjitha pikat e aktakuzës. Gjykimi ka nisur më 3 prill 2023, gati tre vjet pas konfirmimit të aktakuzës, ndërsa të akuzuarit mbahen në paraburgim në Hagë prej rreth pesë vitesh e gjysmë.
Reagimi i Partisë Demokratike të Kosovës
Partia Demokratike e Kosovës (PDK) shprehu shqetësimin për shtyrjen e afatit. Sipas PDK-së, kjo vonesë e pajustifikueshme është dëshmi e një procesi të stërzgjatur që ka humbur kuptimin e drejtësisë dhe është ndikuar nga kalkulime politike.
PDK e cilësoi shtyrjen si goditje ndaj besimit në drejtësi dhe padrejtësi ndaj ish-krerëve të UÇK-së, të cilët po vuajnë një dënim të heshtur përmes vonesave të përsëritura. Partia i bën thirrje bashkësisë ndërkombëtare dhe institucioneve të drejtësisë të reflektojnë, për të mos lejuar që procesi të shndërrohet në shembull të dështimit të drejtësisë ndërkombëtare.
PDK mbetet e bindur për pafajësinë e ish-krerëve dhe kërkon një vendim përfundimtar pa vonesa të mëtejshme, për të mundësuar rikthimin e tyre në Kosovë.