Partia Demokratike e Kosovës (PDK) ka dalë me një deklaratë pas njoftimit të Gjykatës Speciale se deklaratat përmbyllëse në procesin gjyqësor ndaj Hashim Thaçit, Kadri Veselit, Jakup Krasniqit dhe Rexhep Selimit do të zhvillohen nga 9 deri më 18 shkurt. Të akuzuarit ndodhen në paraburgim në Hagë për mbi pesë vjet.
PDK-ja vlerëson se ky proces është shoqëruar me problematika serioze, si zvarritje të panevojshme, paqartësi procedurale dhe vendime që kanë ngritur shqetësime për standardet e drejtësisë dhe respektimin e të drejtave themelore të njeriut. Këto rrethana kanë cenuar perceptimin e drejtësisë së barabartë dhe kanë rënduar mbi çlirimtarët dhe ish-udhëheqësit e shtetit kosovar.
Në fazën përmbyllëse, PDK-ja konsideron thelbësore që gjykimi të përqendrohet ekskluzivisht te drejtësia e paanshme, faktet dhe provat, duke u larguar nga qasjet politike, interpretuese apo spekulative që e kanë shoqëruar procesin gjatë këtyre pesë viteve.
Deklarata thekson se dëshmitarët kyç kanë hedhur poshtë pretendimet kryesore të aktakuzës, duke rrëzuar dyshimet mbi fajësinë individuale, grupore apo komanduese, si dhe duke sqaruar rrethanat faktike dhe dobësuar bazën e akuzave të prokurorisë.
PDK-ja mbetet e përkushtuar ndaj sundimit të ligjit, paqes dhe drejtësisë, duke besuar se vetëm një vendim i drejtë dhe profesional mund të mbyllë këtë kapitull të rëndësishëm për Kosovën, drejtësinë ndërkombëtare dhe të ardhmen e rajonit.