Sot u mbajt konferenca „Kohezioni Social në Shoqëritë e Ndara: Perspektiva Krahasuese dhe Realitete Lokale“, ku u diskutua rëndësia e kohezionit social për zhvillimin e Kosovës dhe rrugën drejt integrimeve euroatlantike.
Kryetari i Mitrovicës së Jugut, Faton Peci, deklaroi se Kosova ka vetëm një destinacion: anëtarësimin në Bashkimin Evropian dhe NATO. Ai nënvizoi nevojën për barazi në shërbime dhe mundësi për të gjithë qytetarët, pa dallim etnie apo feje, si dhe zhvillim të balancuar rajonal.
Peci vuri në dukje se Mitrovica mbetet një nga komunat më të varfra në Kosovë, duke bartur pasoja të padrejta pas luftës. Ai kritikoi ndarjen administrative të qytetit në dy komuna mbi baza etnike, duke thënë se projektimi i shoqërisë mbi ndarjet etnike apo fetare pengon zhvillimin ekonomik dhe integrimin.
Si shembuj krahasues, ai përmendi Mostari dhe Shkupi. Gjithashtu, Peci theksoi mungesën e kryetarit të Mitrovicës së Veriut, Milan Radojeviç, në konferencë, duke e cilësuar si tregues të sfidave në ndërtimin e bashkëpunimit dhe të ardhmes së përbashkët.
Peci foli edhe për projekte konkrete, si impiantin për trajtimin e ujërave të zeza në Mitrovicë, të cilin e shihte si hap të rëndësishëm për përmirësimin e kushteve të jetesës dhe forcimin e bashkëpunimit në qytet.