Faton Peci, kryetar i Mitrovicës së Jugut, reagoi të mërkurën pas raportimeve për tentativën e largimit të billbordeve me fotografitë e Hashim Thaçit dhe Kadri Veselit nga hapësirat publike në komunën që ai udhëheq.
Peci mohoi pretendimet se këto billborde ishin cak specifik, duke theksuar se ato u vendosën pa leje. Ai njoftoi se i kishte rekomanduar autoriteteve komunale përjashtim vetëm për billbordet me fotografitë e ish-presidentit Hashim Thaçi dhe kryekuvendarit Kadri Veseli, për shkak të rrethanave në të cilat gjenden ata.
Në një postim në Facebook, Peci shkroi: "Si kryetar, u kam rekomanduar që të ketë përjashtim vetëm billbordi i vendosur për ish-Presidentin Hashim Thaçi dhe Kryekuvendarin Kadri Veseli për shkak të rrethanave në të cilat gjenden ata. Përfaqësuesit e PDK-së që paskan dalë për të bërë filma në rrugë, le të pijnë ndonjë pije të ftohtë sepse po iu dhimbsen bizneset e jo Thaçi e as Veseli."
Gjatë ditës, punëtorë të kompanisë së kontraktuar u panë duke tentuar largimin e billbordeve nga hapësirat publike në Mitrovicë. Disa qytetarë ndërhynë për të mos lejuar largimin e atyre me figurat e Thaçit dhe Veselit. Në vendngjarje ishte i pranishëm edhe Arian Tahiri, shef i deputetëve të PDK-së në Kuvendin e Kosovës dhe ish-kandidat i kësaj partie për kryetar të Mitrovicës së Jugut.