Faton Peci, kryetar i Mitrovicës Jugore, reagoi në lidhje me largimin e billbordeve në këtë komunë. Ai shpjegoi se autoritetet komunale kanë larguar tabelat reklamuese të vendosura pa leje dhe të shfrytëzuara kundërligjshëm.
Sipas Peci-t, ai ka rekomanduar përjashtim vetëm për billbordin e ish-presidentit Hashim Thaçi dhe kryekuvendarit Kadri Veseli, për shkak të rrethanave në të cilat gjenden ata.
Në postimin e tij në rrjete sociale, Peci theksoi nevojën për ta bërë Mitrovicën një qytet normal ku sundon rregulli, rendi dhe ligji. Ai kritikoi përfaqësuesit e Partisë Demokratike të Kosovës (PDK), duke thënë se ata po bëjnë filma në rrugë dhe se u dhimbsen bizneset e tyre, jo Thaçi apo Veseli.
Postimi i plotë i Peci-t:
"Të dashur qytetarë,
Të gjithë duhet të mësohemi që Mitrovicën ta bëjmë qytet normal ku sundon rregulli, rendi dhe ligji.
Autoritetet komunale po largojnë tabelat reklamuese/billbordat që janë vendosur pa leje dhe shfrytëzohen kundërligjshëm.
Si kryetar, u kam rekomanduar që të ketë përjashtim vetëm billbordi i vendosur për ish-Presidentin Hashim Thaçi dhe Kryekuvendarin Kadri Veseli për shkak të rrethanave në të cilat gjenden ata.
Përfaqësuesit e PDK-së që paskan dalë për të bërë filma në rrugë, le të pijnë ndonjë pije të ftohtë sepse po u dhimbsen bizneset e jo Thaçi e as Veseli."