Kryetari i Bashkisë së Tiranës, Erion Veliaj, përmes një deklarate nga paraburgimi, ka bërë të ditur se do t'i propozojë Këshillit Bashkiak shpalljen e katër ish-drejtuesve të Ushtrisë Çlirimtare të Kosovës (UÇK), Hashim Thaçit, Kadri Veselit, Jakup Krasniqit dhe Rexhep Selimit, si "Qytetarë Nderi" të Tiranës. Ky propozim vjen në vijim të dënimit të tyre nga Gjykata Speciale në Hagë, një vendim që kryebashkiaku e ka cilësuar si tronditës.
Në deklaratën e tij, Veliaj thekson se procesi juridik duhet të ndjekë rrugën e vet dhe se ky propozim nuk synon të zëvendësojë drejtësinë me politikën, por të shprehë mirënjohjen për kontributin historik të këtyre figurave në lirinë dhe shtetësinë e Kosovës. Kryebashkiaku u bëri thirrje kryetarëve dhe këshillave bashkiakë të qyteteve të tjera shqiptare që të ndërmarrin nisma të ngjashme, me qëllim që të tregohet se Shqipëria nuk e harron sakrificën e Kosovës.
Duke reflektuar mbi situatën e tij personale, Veliaj u shpreh se ndodhet në izolim prej 19 muajsh, pa mundësi reale për të ushtruar mandatin e tij si kryetar i Bashkisë së Tiranës. Ai po ashtu komentoi vendimin e fundit të Gjykatës së Lartë, duke e cilësuar atë si një "grusht institucional ndaj demokracisë vendore", pas refuzimit të kërkesës së tij për lirim. Pavarësisht situatës, ai nënvizoi se drama e tij personale është e vogël përpara çështjes kombëtare dhe kujtesës për luftën e Kosovës.