Lulzim Peci, drejtori i KIPRED, ka reaguar lidhur me zhvillimet e fundit rreth procesit zgjedhor në Kosovë, duke ngritur shqetësime serioze për integritetin e votës.
Peci ka deklaruar se vjedhja e votave brenda partive politike ka kaluar përmasat e asaj që ishte quajtur vjedhje industriale në zgjedhjet e vitit 2010, duke theksuar se ky fenomen shfaqet pothuajse në secilën parti politike.
Ai ka shkruar: “Diçka është thellësisht e kalbur në vendin tonë”, duke e cilësuar situatën alarmante për demokracinë dhe shtetin e së drejtës.
Peci ka kritikuar ashpër ata që manipulojnë vullnetin qytetar përmes falsifikimit të votës, duke i krahasuar me xheparosha dhe duke i quajtur veprimet e tyre të turpshme e të dënueshme. Në postimin e tij, ai shkruan: “Çfarë ka ndodhur me vjedhjen e votave brenda partive? Si po duket, e ka kaluar dimensionin e ‘vjedhjes industriale’ të vitit 2010, dhe atë secila parti! Diçka është thellësisht e kalbur në vendin tonë! Turp për ju që i përngjani xheparoshave që e keni bërë përmes falsifikimit të vullnetit qytetar! Nuk e di se si mund të dilni përballë njerëzve të ndershëm të vendit tonë, të cilët e dhanë provimin qytetar të demokracisë më 28 dhjetor.”