Laura Pula, koordinatorja nacionale e zgjedhjeve në Prokurorinë e Shtetit, foli në emisionin Info Magazine të Klan Kosovës për manipulimet e votave në zgjedhjet e parakohshme parlamentare të 28 dhjetorit.
Ajo i cilësoi këto manipulime si të papritura, duke thënë se një vjedhje kaq e madhe dhe falsifikim masiv i votave nuk kishte ndodhur me vite. Pula përmendi se që nga viti 2013, kur ajo përcjell procesin si koordinatore, sistemi prokurorial ka ndërmarrë iniciativa për përmirësimin e procesit zgjedhor.
Sipas saj, pas zgjedhjeve të vitit 2010, që ishin pothuajse mjaft të këqija për shkak të parregullsive të theksuara, sistemi prokurorial mori iniciativë për të nënshkruar një memorandum bashkëpunimi me institucionet relevante, si KQZ-në, Policinë e Kosovës, Këshillin Gjyqësor dhe sistemin prokurorial.
Qëllimi i këtij bashkëpunimi ka qenë mbrojtja e votës së qytetarit dhe ka dhënë rezultate të pamohueshme. Megjithatë, manipulimet në zgjedhjet e fundit për deputetë të Kuvendit të Republikës së Kosovës i befasuan autoritetet.
Pula theksoi se i tërë opinioni e di se një fenomen i tillë nuk kishte ndodhur prej vitesh.