Peleshi dërgon projektligjin për financimin e partive në Komisionin e Venecias

Kryetari i Kuvendit, Niko Peleshi, i është drejtuar zyrtarisht Komisionit të Venecias me një kërkesë për opinion mbi projektligjin “Për financimin e partive politike”. Kërkesa u dërgua me letër më 27 prill 2026, ndërsa Komisioni e njoftoi publikisht më 13 maj 2026. Projektligji synon rregullimin e kuadrit ligjor për financimin e subjekteve politike në Shqipëri dhe është draft i dakordësuar mes dy forcave kryesore politike.

Projekt-opinioni pritet të diskutohet dhe miratohet në Sesionin e 147-të Plenar të Komisionit të Venecias, i cili zhvillohet më 12–13 qershor 2026. Ky proces përfshin edhe Drejtorinë e Përgjithshme për të Drejtat e Njeriut dhe Sundimin e Ligjit të Këshillit të Evropës.

Ndalimet për donatorët

Projektligji parashikon ndalime të plota për kategori të caktuara:

• Kompanitë me kontrata koncesionare ose PPP;
• Bizneset e lojërave të fatit ose në fushën e kriptomonedhave;
• Institucionet qeveritare ose joqeveritare të huaja, biznese dhe persona fizikë të huaj;
• Dhuruesit anonimë;
• Organizatat joqeveritare, humanitare, fetare ose sindikale;
• Të dënuarit për korrupsion, pastrim parash, krim të organizuar, trafik droge ose krime zgjedhore.

Kufizimet e donacioneve

Qytetarët e thjeshtë mund të dhurojnë deri në 200 mijë lekë në vit, personat fizikë me NIPT deri në 500 mijë lekë, ndërsa kompanitë deri në 1 milion lekë në vit. Çdo donator nënshkruan një deklaratë ku konfirmon se nuk bie në kategoritë e ndaluara dhe mban përgjegjësi për deklarim të rremë. Dhurimet mbi 500 mijë lekë kryhen vetëm përmes sistemit bankar.

Fondi publik vjetor

Paratë e buxhetit të shtetit shpërndahen përmes një Fondi Publik Vjetor, i cili nuk mund të jetë më i ulët se ai i vitit paraardhës në vitet jozgjedhore. Shpërndarja ndjek performancën elektorale: 70% sipas numrit të deputetëve, 20% në mënyrë të barabartë për partitë parlamentare dhe ato me mbi 10 mijë vota.