Niko Peleshi, Kryetar i Kuvendit të Shqipërisë, i shoqëruar nga deputetët e Grupit Parlamentar të Miqësisë me Italinë, u takua me Ignazio La Russa, President i Senatit të Republikës Italiane, në vijim të vizitës zyrtare në Itali më 15 janar 2026.
Gjatë takimit u riafirmuan lidhjet e fuqishme historike dhe aktuale miqësore mes dy popujve, të cilat përbëjnë bazën e bashkëpunimit mes parlamenteve, qeverive dhe institucioneve të të dy vendeve.
Peleshi shprehu mirënjohjen e shqiptarëve për mbështetjen e vazhdueshme të Italisë në zhvillimin, demokratizimin dhe progresin e Shqipërisë. Ai theksoi se Shqipëria ka zgjedhur një destinacion të vetëm strategjik për të ardhmen, familjen europiane, dhe po ecën me shpejtësi drejt Bashkimit Europian, duke vlerësuar mbështetjen e fuqishme të Italisë dhe lobimin e saj me vendet e tjera anëtare të BE-së.
Palët diskutuan rëndësinë e bashkëpunimit ekonomik e tregtar, si dhe potencialet e reja për zgjerim në sektorë si teknologjia e informacionit dhe inteligjenca artificiale. U vlerësua roli i komunitetit arbëresh dhe i emigrantëve shqiptarë në Itali si urë e rëndësishme miqësie, bashkë me mbështetjen italiane për ruajtjen e gjuhës, kulturës dhe vlerave të arbëreshëve.
Peleshi nënvizoi nevojën për zgjerimin e bashkëpunimit parlamentar mes Kuvendit të Shqipërisë dhe Senatit Italian, si dhe kontributin e Italisë për stabilitetin, sigurinë dhe perspektivën europiane të Ballkanit Perëndimor.
Nga ana e tij, La Russa rikonfirmoi mbështetjen e Italisë për avancimin e shpejtë dhe anëtarësimin sa më parë të Shqipërisë në Bashkimin Europian. Ai theksoi se të dy vendet janë aleate të ngushta në NATO dhe vlerësoi politikën e jashtme dhe të sigurisë së Shqipërisë në mbrojtje të vlerave të lirisë, demokracisë dhe paqes.