Ministri i Shëndetësisë, Arben Vitia, ka bërë të ditur se për herë të parë në sistemin publik shëndetësor, në Qendrën Klinike Universitare të Kosovës (QKUK), është konfirmuar një shtatzëni pas procedurave të fertilizimit të asistuar mjekësor (IVF).
Ai e shpalli këtë lajm përmes një postimi në Facebook, duke e cilësuar si shpresë për shumë gra që presin të bëhen nëna. Sipas Vitisë, kjo procedurë tani mund të realizohet në QKUK, ku dy procedurat e para ofrohen pa pagesë.
Ministri falënderoi ekipin profesional të Klinikës së Gjinekologjisë në QKUK për punën dhe përkushtimin e vazhdueshëm në realizimin e këtij procesi.
Në institucionet private, ky shërbim kushton nga 3 deri në 4 mijë euro, ndërsa në QKUK dy herët e para kryhen falas dhe më pas çmimi për një procedurë është 670 euro.