Në Dhomat e Specializuara të Kosovës në Hagë ka përfunduar seanca për paraqitjen e deklaratave përfundimtare në çështjen penale ndaj ish-presidentit Hashim Thaçi dhe bashkëpunëtorëve të tij, të akuzuar për vepra penale kundër administrimit të drejtësisë. Të gjithë të pandehurit, Hashim Thaçi, Bashkim Smakaj, Isni Kilaj, Fadil Fazliu dhe Hajredin Kuçi, ushtruan të drejtën e tyre për të mos folur në përfundim të këtij procesi.
Prokuroria e Specializuar ka kërkuar dënime konkrete për të gjithë të akuzuarit, duke propozuar 6 vjet burgim për Hashim Thaçin, nga 3 vjet për Bashkim Smakajn, Isni Kilajn dhe Fadil Fazliun, ndërsa për Hajredin Kuçin është kërkuar dënim prej 9 muajsh. Ekipet e mbrojtjes kanë hedhur poshtë pretendimet e prokurorisë, duke kërkuar lirimin e të akuzuarve.
Avokatja e Hashim Thaçit, Sophie Menegon, argumentoi se nuk ka pasur asnjë grup të strukturuar për pengimin e drejtësisë dhe se provat e prokurorisë janë të pabazuara. Ajo nënvizoi se veprimet e ish-presidentit, për të cilat ai akuzohet si tentativë ndërhyrjeje, nuk kanë pasur ndikim në procesin gjyqësor.
Një vëmendje e veçantë iu kushtua mbrojtjes së Hajredin Kuçit. Avokati i tij, Alexander Admiral, kritikoi prokurorinë për mungesë provash ndaj klientit të tij, duke theksuar se gjatë gjithë procedurës nuk është paraqitur asnjë dëshmi për kontaktim të dëshmitarëve, mesazhe apo takime të dyshimta. Sipas mbrojtjes, Hajredin Kuçi nuk është marrë asnjëherë në pyetje gjatë dy viteve të procesit. Pas përfundimit të parashtrimeve nga të gjitha palët, pritet që Gjykatësi i Vetëm të shqyrtojë provat dhe argumentet përpara marrjes së vendimit përfundimtar.
Përditësime
Mbrojtja e të akuzuarve në rastin për pengim të drejtësisë paraqiti kundërargumentet e fundit. Avokati i Fadil Fazliut, David Young, deklaroi se akuza ndaj klientit të tij bazohet në dy takime në lokalin 'Route 66' me Remzi Mustafën, për të cilat prokuroria nuk ka siguruar dëshmi konkrete mbi përmbajtjen e bisedave. Nga ana tjetër, mbrojtja e Hajredin Kuçit vlerësoi se pretendimet e prokurorisë mbështeten vetëm në 'tetë fjalë të thjeshta' të thëna ndaj një miku të vjetër, pa provuar asnjë ndikim mbi dëshmitarët ose rrjedhën e procedurave gjyqësore.
Prokurori Matt Halling akuzoi mbrojtjen se po shmang qëllimisht provat dhe ligjet gjatë procesit. Mbrojtja e Hashim Thaçit kontestoi transkriptet e ZPS-së, duke argumentuar se hartuesit e tyre janë persona të panjohur që nuk janë thirrur për dëshmi. Ndërkohë, avokati i Bashkim Smakajt e vlerësoi dokumentacionin e prokurorisë si të pabazuar, duke e cilësuar si përmbledhje thashethemesh dhe incizimesh të paqarta. Palët në proces iu përgjigjën gjithashtu pyetjeve direkte të Gjykatësit të Vetëm lidhur me pretendimet e ngritura.