Në Dhomat e Specializuara të Kosovës në Hagë po zhvillohet dita e tretë e procesit gjyqësor ndaj ish-presidentit Hashim Thaçi dhe katër të akuzuarve të tjerë për vepra penale kundër administrimit të drejtësisë: Bashkim Smakaj, Isni Kilaj, Fadil Fazliu dhe Hajredin Kuçi.
Zyra e Prokurorit të Specializuar ka paraqitur kërkesat për dënimet me burg si në vijim:
- Hashim Thaçi: 6 vjet burgim
- Bashkim Smakaj, Isni Kilaj dhe Fadil Fazliu: nga 3 vjet burgim secili
- Hajredin Kuçi: 9 muaj burgim
Ekipet e mbrojtjes i kanë kundërshtuar këto kërkesa, duke i kërkuar Gjykatësit të Vetëm shpalljen e pafajësisë për të gjithë të akuzuarit. Avokatja e Thaçit, Sophie Menegon, gjatë parashtrimeve përfundimtare, argumentoi se provat e paraqitura nga Prokuroria janë të pabazuara dhe se nuk ka ekzistuar ndonjë grup i organizuar me qëllim pengimin e drejtësisë. Mbrojtja theksoi gjithashtu se veprimet për të cilat akuzohet ish-presidenti kanë të bëjnë me pretendime për tentativë ndërhyrjeje dhe jo për kryerjen e ndonjë vepre penale të përfunduar.
Pas përfundimit të deklaratave dhe komenteve përfundimtare të palëve, çështja pritet të hyjë në fazën e vendimmarrjes nga Gjykatësi i Vetëm.
Përditësime
Prokurori Matt Halling akuzoi palën mbrojtëse për shmangie të qëllimshme nga kuadri ligjor dhe provat faktike të paraqitura gjatë shqyrtimit. Gjatë seancës, Prokuroria detajoi kronologjinë e dëshmitarëve të thirrur në periudhën shkurt-maj 2026, duke kundërshtuar argumentet e mbrojtjes. Seanca do të vazhdojë me kundërpërgjigjet e ekipeve mbrojtëse, të cilat do të shënojnë mbylljen e fazës së deklaratave përfundimtare.
Gjykatësi i vetëm Christopher Gosnell shpalli zyrtarisht mbylljen e procesit gjyqësor për rastin e tentim-pengimit të drejtësisë, duke eliminuar mundësinë për dëgjimin e mëtejshëm të dëshmitarëve ose paraqitjen e provave. Gjatë seancës përmbyllëse, u konstatua se disa dëshmitarë kyçë të Prokurorisë mohuan çdo diskutim mbi dëshmitë e tyre me të akuzuarit. Dhomat e Specializuara konfirmuan se aktgjykimi për rastin kryesor ndaj krerëve të UÇK-së pritet më 16 shtator, ndërsa vendimi për këtë çështje të dytë është parashikuar deri më 14 dhjetor.
Prokurori Joshua Hafetz deklaroi se ish-presidenti Hashim Thaçi ka dhënë udhëzime të detajuara për dëshminë gjatë vizitave me të akuzuarin Bashkim Smakaj. Palët kanë përmbyllur zyrtarisht seancat tre-ditore të fjalëve përfundimtare.
Prokurori Matt Halling akuzoi mbrojtjen se po largohet nga ligji dhe jurisprudenca përkatëse. Prokuroria argumentoi se mungesa e çështjeve të ngjashme në Kosovë buron nga natyra specifike e rastit. Në mbyllje të seancës përfundimtare, të akuzuarit Hashim Thaçi dhe Bashkim Smakaj refuzuan të flasin.