Në Dhomat e Specializuara të Kosovës në Hagë ka nisur sot paraqitja e deklaratave përmbyllëse në gjyqin ndaj ish-presidentit të Kosovës, Hashim Thaçi, si dhe Bashkim Smakajt, Isni Kilajt, Fadil Fazliut dhe Hajredin Kuçit. Të gjithë të pandehurit akuzohen për pengim të drejtësisë, veprime të cilat sipas aktakuzës kanë ndodhur midis prillit dhe nëntorit të vitit 2023. Gjatë kësaj periudhe, ata dyshohet se kanë ndikuar te dëshmitarët e thirrur nga prokurorët për çështjen kryesore të krimeve të luftës.
Sipas njoftimit të gjykatës, seancat për deklaratat përmbyllëse do të mbahen më 10, 11 dhe 14 shtator 2026. Në këtë fazë, Zyra e Prokurorit të Specializuar dhe ekipet mbrojtëse do të kenë kohë për të shpalosur argumentet e tyre përfundimtare përpara se gjykatësi të marrë vendimin për rastin. Hashim Thaçi përballet me tri akuza për tentim për pengim të personave zyrtarë dhe tetë akuza për shkelje të fshehtësisë së procedurës. Të akuzuarit e tjerë përballen me akuza të ndryshme për pengim të personave zyrtarë dhe mosbindje ndaj gjykatës, ndërsa të pesë janë vetëdeklaruar të pafajshëm.
Dy ditë pas përfundimit të këtij procesi, Hashim Thaçi, së bashku me Kadri Veselin, Jakup Krasniqin dhe Rexhep Selimin, do të dalin para trupit gjykues për t’u përballur me aktgjykimin për krime lufte dhe krime kundër njerëzimit, proces për të cilin Prokuroria ka kërkuar dënimin me 45 vjet burgim për secilin. Lidhur me paraburgimin e Hashim Thaçit, i cili ndodhet në qendrën e paraburgimit në Hagë që nga nëntori i vitit 2020, gjykatësi i vetëm ka theksuar në vendimin e fundit të 31 korrikut se vazhdon të ekzistojë rreziku i pengimit të procedurave.
Përditësime
Prokurori i Specializuar Joshua Hafetz kërkoi dënimin me 6 vite burgim për Hashim Thaçin gjatë seancës përmbyllëse në Hagë. Prokuroria akuzon ish-presidentin për koordinimin e tri grupeve të ndryshme midis 12 prillit 2023 dhe 2 nëntorit 2024 me qëllim ndikimin te dëshmitarët. Për të akuzuarit e tjerë, Isni Kilajn, Bashkim Smakajn, Fadil Fazliun dhe Hajredin Kuçin, prokuroria kërkoi dënim me nga 3 vite burgim për secilin.
Hashim Thaçi po e ndjek ditën e dytë të fjalimeve përmbyllëse në procesin për pengim të drejtësisë përmes lidhjes video nga qendra e paraburgimit. Gjatë ditës së parë të seancave, Thaçi ishte i vetmi nga të akuzuarit që u paraqit fizikisht në sallën e gjyqit në Hagë.