Ministri i Bujqësisë dhe Zhvillimit Rural, Andis Salla, së bashku me kryetaren e Bashkisë Durrës, Emiriana Sako, zhvilluan një vizitë inspektimi në Hidrovorin e Hamallajt, pas përfundimit të punimeve për rehabilitimin e këtij objekti. Investimi është realizuar nga Qeveria Shqiptare përmes Ministrisë së Bujqësisë dhe Zhvillimit Rural, si përgjigje ndaj një kërkese të paraqitur nga Bashkia Durrës.
Ndërhyrja ka synuar modernizimin e infrastrukturës ekzistuese, duke përfshirë instalimin e pompave të reja me kapacitet të shtuar dhe pajisjen e stacionit me sisteme automatike të komandimit. Këto masa pritet të rrisin efikasitetin dhe sigurinë e sistemit të kullimit, veçanërisht gjatë periudhave me reshje intensive në stinën e dimrit.
Sipas të dhënave zyrtare, funksionimi i këtij hidrovori garanton mbrojtjen e mbi 1 300 hektarëve tokë bujqësore, ndërsa sipërfaqja totale që varet nga ky sistem përllogaritet në rreth 2 mijë hektarë. Ministri Salla theksoi se projekti ka rëndësi strategjike jo vetëm për sektorin e bujqësisë, por edhe për zonat e banuara dhe turizmin në zhvillim të shpejtë në këtë rajon të Durrësit.
Në deklaratën e tij, ministri konfirmoi se qeveria do të vijojë me investime të tjera në infrastrukturën e ujitjes dhe kullimit në rang kombëtar, me qëllim mbështetjen e fermerëve dhe mbrojtjen e prodhimit bujqësor nga rreziqet natyrore.