Ka përfunduar afati i katërt për zbatimin e reformave në kuadër të Planit të Rritjes për vendet e Ballkanit Perëndimor. Pas mbylljes së afatit më 30 qershor, shtetet përfituese kanë detyrimin të dorëzojnë raportet e progresit deri më 15 korrik. Vlerësimi i këtyre raporteve nga Komisioni Europian do të përcaktojë vijimin e disbursimit të fondeve për secilin vend.
Zëdhënësi i Komisionit Europian, Guillaume Mercier, nënvizoi për Radion Evropa e Lirë se instrumenti financiar bazohet tërësisht në performancë. Sipas tij, fondet lëshohen vetëm pas zbatimit të plotë të reformave. Të dhënat zyrtare tregojnë se 78 për qind e reformave të raportuara në tre ciklet e para kanë shënuar përparim, ndërsa 22 për qind mbeten të bllokuara.
Sipas rregulloreve, fondet janë të kufizuara në kohë. Nëse një vend dështon në përmbushjen e detyrimeve, fondet mund të pezullohen dhe të rishpërndahen tek vendet që demonstrojnë performancë më të mirë, me një afat maksimal prej një viti përpara ridrejtimit të mjeteve financiare.
Bilanci i deritanishëm i reformave për vendet e rajonit:
• Shqipëria: 33 reforma të zbatuara dhe 212 milionë euro të përfituara (nga totali prej 922 milionë eurosh).
• Mali i Zi: 32 reforma të realizuara dhe 90 milionë euro të përfituara.
• Maqedonia e Veriut: 22 reforma të përmbushura dhe 142 milionë euro të përfituara.
• Kosova: Nuk ka përmbushur ende ndonjë hap reformues, duke përfituar vetëm 61 milionë euro si parafinancim.