Ka përfunduar procesi i votimit për qytetarët e Republikës së Kosovës që jetojnë jashtë vendit, të cilët ushtruan të drejtën e tyre në përfaqësitë diplomatike dhe konsullore.
Ministria e Punëve të Jashtme dhe Diasporës (MPJD) njoftoi përmes një deklarate zyrtare se votimi është zhvilluar në mënyrë të rregullt dhe në përputhje me procedurat ligjore. Sipas institucionit, pikat e votimit ishin hapur me kohë në orën 07:00, duke mundësuar pjesëmarrjen e qytetarëve të regjistruar paraprakisht.
Në mesazhin e saj, MPJD falënderoi bashkatdhetarët për pjesëmarrjen, duke theksuar se ata dëshmuan lidhjen e fortë me atdheun dhe rolin e tyre aktiv në jetën demokratike të vendit. Njëkohësisht, ministria shprehu mirënjohje për misionet diplomatike dhe konsullore për angazhimin e tyre profesional, si dhe për bashkëpunimin e ngushtë me Komisionin Qendror të Zgjedhjeve (KQZ) gjatë gjithë procesit zgjedhor.