Gjashtë të burgosur kanë mbetur të lënduar pas një përleshjeje fizike të dhunshme që ndodhi pasditen e së martës në ambientet e burgut të Domokosit, në prefekturën Ftiotis, në pjesën qendrore të Greqisë. Përplasja raportohet të ketë ndodhur mes të burgosurve shqiptarë dhe atyre me shtetësi algjeriane. Të plagosurit, të moshave nga 26 deri në 41 vjeç, janë dërguar fillimisht për ndihmë mjekësore në Qendrën Shëndetësore të Domokosit.
Pas vlerësimit të gjendjes, 4 prej tyre janë transferuar për trajtim të specializuar në Spitalin e Lamias. Njëri prej të burgosurve, një shtetas sirian 29-vjeçar, ka pësuar dëmtime të rënda në kokë dhe i është nënshtruar një operacioni urgjent, ndërsa gjendja e tij shëndetësore vijon të mbetet e rëndë. Një tjetër i lënduar, i cili ishte goditur me një thikë të improvizuar, ndodhet jashtë rrezikut për jetën pas ndërhyrjes së mjekëve.
Autoritetet përkatëse kanë nisur hetimet për të zbardhur shkaqet e këtij incidenti, të cilat mbeten ende të paqarta. Kjo ngjarje shënon rastin e tretë të përleshjeve të këtij lloji në burgun e Domokosit brenda një periudhe të shkurtër kohore.
Përditësime
Hetimet zbuluan se përleshja ndodhi mes grupeve të të burgosurve shqiptarë dhe algjerianë, ndërsa mes të plagosurve rëndë është një 29-vjeçar sirian.