Një ngjarje e rëndë detare ka ndodhur në jug të Vietnamit, ku një motoskaf që po kthehej nga ishulli Hon May Rut Ngoai drejt Portit Ndërkombëtar An Thoi u përmbys rreth 400 metra larg bregut. Në mjetin lundrues udhëtonin 32 turistë indianë dhe 4 pjesëtarë të ekuipazhit.
Sipas informacioneve paraprake të autoriteteve vietnameze, kushtet e pafavorshme të motit, të karakterizuara nga erëra të forta dhe dallgë të mëdha, janë shkaku kryesor i dyshuar për përmbysjen e mjetit. Ekipet e shpëtimit, përfshirë rojen kufitare, marinën dhe mjete të tjera turistike në zonë, arritën të shpëtojnë 21 pasagjerë, të cilët u dërguan për trajtim mjekësor.
Zyrtari lokal Nguyen Thien Hai deklaroi se fokusi aktual mbetet te operacionet e kërkim-shpëtimit dhe asistenca për të mbijetuarit. Nga ana tjetër, Ambasada e Indisë në Vietnam ka aktivizuar linja telefonike dhe dhoma kontrolli në Hanoi dhe Ho Chi Minh City për të mbështetur familjarët e viktimave.
Kryeministri i Indisë, Narendra Modi, ka reaguar përmes një njoftimi në platformën X, ku u ka shprehur ngushëllime familjeve të viktimave dhe ka uruar shërim të shpejtë për të mbijetuarit. Autoritetet vijojnë hetimet për të zbardhur rrethanat e sakta të incidentit, ndërsa operacioni në vendngjarje mbetet në zhvillim e sipër për verifikimin e plotë të të gjithëndurve në bord.
Përditësime
Autoritetet vietnameze konfirmuan se në bordin e motoskafit të përmbysur ndodheshin 3 anëtarë të ekuipazhit dhe 1 shoqërues. Ishulli Phu Quoc është një destinacion në rritje për turistët indianë, të cilët përbëjnë një pjesë të konsiderueshme të flukseve turistike në zonë.