Një traget pasagjerësh, i identifikuar si KMP Mutiara Sentosa 2, u përfshi nga flakët gjatë lundrimit në det pranë ishullit Madura në Indonezi, duke shkaktuar humbjen e jetës së pesë personave. Sipas të dhënave nga Agjencia Kombëtare e Kërkim-Shpëtimit (Basarnas), 41 persona të tjerë rezultojnë aktualisht të zhdukur.
Anija ishte nisur nga qyteti Surabaya, në provincën Java Lindore, me destinacion qytetin Makassar në Sulawesin Jugor. Sipas autoriteteve, në bord ndodheshin midis 250 dhe 271 persona, përfshirë pasagjerë dhe pjesëtarë të ekuipazhit. Deri në këto momente, ekipet e shpëtimit kanë arritur të evakuojnë 225 persona. Shumë pasagjerë u detyruan të hidheshin në det për t’i shpëtuar flakëve që kishin përfshirë pjesën më të madhe të tragetit, ndërsa të tjerë pritën ndihmën në pjesën e përparme të mjetit lundrues.
Kapiteni i tragetit njoftoi për zjarrin në orët e para të mëngjesit, megjithatë komunikimi me të u shkëput pas raportimit fillestar. Agjencia Rajonale e Kërkimit dhe Shpëtimit në Surabaya njoftoi se katër anije ndodheshin në zonë për të ofruar ndihmë, por e kishin të pamundur të afroheshin pranë mjetit për shkak të rrezikut nga materialet e ndezshme në bord. Një operacion i gjerë kërkim-shpëtimi është duke u zhvilluar nga Surabaya për të gjetur personat e zhdukur dhe për të hetuar shkaqet e incidentit, të cilat mbeten ende të paqarta.
Përditësime
Sipas kompanisë së transportit, zjarri në tragetin KMP Mutiara Sentosa 2 ka nisur midis orës 06:00 dhe 07:00, ndërsa autoritetet u njoftuan zyrtarisht në orën 08:24. Pamjet në vendngjarje shfaqin pasagjerët me jelekë shpëtimi duke u evakuuar nga pjesa e urës së anijes.