Autoritetet indoneziane nisën pasdrekën e 17 janarit 2026 një operacion kërkimi-shpëtimi për një avion të vogël me 11 persona në bord, me të cilin u humb kontakti teksa fluturonte mbi pjesën lindore të vendit.
Avioni, në pronësi të kompanisë ajrore Indonesia Air Transport, ishte nisur nga Yogyakarta në ishullin Java me destinacion Makassar në Sulawesin Jugor. Në bord ndodheshin tre pasagjerë dhe tetë anëtarë të ekuipazhit. Kontakti u ndërpre pak pas orës 13:00 me orën lokale, që korrespondon me orën 07:00 me orën e Shqipërisë.
Shefi i shërbimit lokal të kërkim-shpëtimit, Muhammad Arif Anuar, deklaroi se ekipet u dislokuan në një zonë malore të rajonit Maros, rreth 42 kilometra larg kryeqendrës provinciale Makassar, ku u regjistrua për herë të fundit sinjali i avionit.
Në operacionin nga toka dhe ajri po marrin pjesë forcat ajrore, policia dhe vullnetarë. Drejtori i operacioneve të shërbimit të kërkim-shpëtimit në Makassar, Andi Sultan, bëri të ditur se në zonë janë dërguar një helikopter dhe dronë për lokalizimin sa më të shpejtë të avionit.
Autoritetet nuk kanë dhënë ende informacion mbi fatin e personave në bord, ndërsa kërkimet vijojnë.
Përditësime
Muhammad Arif Anwar deklaroi se situata po ndiqet me prioritet të lartë nga ekipet që punojnë intensivisht. Ai thirri për qetësi dhe premtoi zhvillime të reja në orët në vijim.