Kryeministri i ri i Hungarisë, Péter Magyar, deklaroi në një intervistë për revistën gjermane Der Spiegel se fundi i epokës së Viktor Orbánit erdhi në momentin kur qytetarët nuk ndjenin më frikë nga pushteti dhe filluan ta sfidonin atë. Magyar, i lindur në vitin 1981, ishte pjesë e partisë Fidesz deri dy vite më parë, përpara se të distancohej nga sistemi i ish-kryeministrit.
Sipas Magyar, momenti i kthesës erdhi pas një interviste në median online Partizán në shkurt të vitit 2024, e cila u ndoq nga gati 3 milionë njerëz. Ky angazhim publik u pasua nga protesta masive kundër korrupsionit dhe klientelizmit, ku morën pjesë fillimisht 50 mijë qytetarë, ndërsa tri javë më vonë numri i pjesëmarrësve arriti në 200 mijë.
Kryeministri hungarez theksoi se suksesin e partisë së tij Tisza e përkufizon si një reagim ndaj gënjeshtrave dhe propagandës së vazhdueshme. Ai vlerësoi se ndërsa hungarezët janë një popull i durueshëm, dëshira për liri shënoi fundin e kontrollit të plotë që Orbán kishte ushtruar mbi aparatin shtetëror dhe median për më shumë se një dekadë e gjysmë. Magyar u shpreh se shndërrimi i frikës në ironi ndaj sistemit ishte treguesi kryesor se pushteti kishte humbur ndikimin mbi votuesit.
Përditësime
Péter Magyar pranoi se besimi i tij për fitoren ndaj regjimit të Viktor Orbán u rrit vetëm gjatë gjysmës së dytë të vitit 2025. Ai shpjegoi se strategjia e tij u përqendrua në zhvleftësimin e narrativave zyrtare mbi Brukselin, emigrantët dhe Ukrainën, duke provuar se propaganda qeveritare kishte humbur ndikimin tek publiku.