Ish-diplomati austriak, Wolfgang Petritsch, ka shprehur shqetësimin mbi zhvillimet politike në Kosovë, duke vlerësuar se mbajtja e zgjedhjeve të njëpasnjëshme ka shkaktuar humbje të madhe të besimit ndaj shtetit. Në një intervistë për Radio Evropa e Lirë, ai theksoi se situata politike krijon përshtypjen se Kosova po dështon në përpjekjet për t'u shfaqur si shtet serioz.
Sipas Petritsch, mungesa e një qeverie stabile për një vit e gjysmë dhe pamundësia për të zgjedhur presidentin mund t'i nxisin vendet mosnjohëse të forcojnë qëndrimet e tyre kundërshtuese ndaj pavarësisë së Kosovës.
Duke komentuar rolin e qytetarëve, ai theksoi se ata duhet t'i kërkojnë llogari partisë që drejton institucionet e vendit. "Unë nuk dua të përfshihem në politikën e brendshme, por qytetarët duhet t'i thonë partisë dominuese dhe liderit të saj se është koha të veprojnë", deklaroi Petritsch.