Drejtori i Përgjithshëm i Policisë së Shtetit, Skënder Hita, ka urdhëruar pezullimin e menjëhershëm nga detyra të gjithë zinxhirit komandues të Komisariatit të Policisë Himarë, të cilët kanë qenë në shërbim gjatë periudhës kur është ngritur një objekt pa leje në zonën e njohur si "Sugë" në Qeparo.
Vendimi pasoi verifikimet e kryera nga Drejtoria e Standardeve Profesionale, të cilat konstatuan neglizhencë në parandalimin e ndërtimit të paligjshëm që kishte filluar që në dhjetor të vitit 2025. Objekti në fjalë përbëhet nga një kat nëntokë dhe katër kate mbi tokë.
Punonjësit e pezulluar dhe ndaj të cilëve ka nisur një hetim disiplinor janë:
• Ferit Merkaj, ish-Shef i Komisariatit të Policisë Himarë, aktualisht Shef i Seksionit për Trafiqet e Paligjshme në DVP Vlorë;
• Emiljano Prenga, ish-Shef i Seksionit për Hetimin e Krimeve në Volum në Himarë, aktualisht me detyrë në Komisariatin e Policisë Divjakë;
• Klodjan Petani, ish-Specialist për Hetimin e Krimit në Himarë, aktualisht Specialist në Komisariatin e Policisë Vlorë;
• Redin Çaushaj, Inspektor dhe Ndihmës/Specialist për zonën ku u konstatua ndërtimi.
Shtetasi L. B., banues në Laç, i cili rezulton të jetë ndërtuesi i objektit, është arrestuar nga Policia e Himarës. Njëkohësisht, autoritetet kanë shpallur në kërkim tre punonjës të Inspektoratit Ndërtimor (IMT) të Bashkisë Himarë, përfshirë kryeinspektorin, nën akuzën për veprën penale "Shpërdorim detyre". Policia e Shtetit deklaroi se masa e marrë synon ndëshkimin e çdo punonjësi që nuk zbaton ligjin dhe cenon besimin e qytetarëve.
Përditësime
IKMT ka finalizuar sot shembjen e objektit 5-katësh në Qeparo, ndërsa hetimet kanë zbardhur detaje të reja mbi përfshirjen e zyrtarëve dhe ndërtuesit. Autoritetet identifikuan tre punonjësit e IMT-së në kërkim: Dorjan Hoxha, Andi Hoxha dhe Mateo Koshi. Policia arrestoi ndërtuesin Lulzim Bujari, 39 vjeç, nga Tirana. Hetimet zbuluan se ndërtimi u përshpejtua në mënyrë të paligjshme përmes pretendimeve të rreme për legalizim, duke anashkaluar procedurat standarde urbanistike.
Drejtori i Përgjithshëm i Policisë së Shtetit, Skënder Hita, urdhëroi pezullimin nga detyra të katër punonjësve të Komisariatit të Himarës, si pasojë e neglizhencës në monitorimin e territorit. Hetimet e thelluara zbuluan se ndërtimi i objektit 5-katësh në zonën e quajtur 'Sugë' kishte filluar që në dhjetor 2025. Struktura e ndaluar përbëhet nga një kat nëntokë dhe katër kate mbi tokë.
Agjencia e Mbikëqyrjes Policore (AMP) ndaloi punonjësit Emiljano Prenga dhe Klodian Petani, të cilët ishin shpallur më parë në kërkim. Ndërkohë, autoritetet vijojnë operacionin për gjetjen e Ferit Merkajt dhe Redin Çaushajt, të cilët mbeten ende në kërkim pasi nuk u lokalizuan gjatë kontrolleve në banesat e tyre.
Kryebashkiaku i Himarës, Vangjel Tavo, ka shkrirë zyrtarisht Inspektoriatin e Mbrojtjes së Territorit (IMT) të bashkisë, si masë drastike pas neglizhencës së konstatuar në kontrollin e zonës. Tavo ka firmosur shkarkimin e 5 zyrtarëve të këtij institucioni dhe ka njoftuar se do të përcjellë kallëzim penal në prokurori ndaj inspektorëve përkatës. Bashkia e Himarës do t'i drejtohet IKMT-së për të kërkuar mbulimin institucional të territorit dhe garantimin e ligjshmërisë, pas shuarjes së strukturës vendore.