Specialistët e Seksionit për Hetimin e Krimeve ndaj Personit në DVP Vlorë referuan materialet në Prokurori dhe shpallën në kërkim shtetasit F. B., 34 vjeç, K. Xh., 33 vjeç dhe E. H., 25 vjeç, pas një konflikti me thikë.
Ngjarja ndodhi më 28 mars 2026 në lagjen "15 Tetori" të Vlorës. Pas një konflikti për motive të dobëta, dyshohet se shtetasi F. B. ka goditur me mjet prerës (thikë) shtetasin S. M., 32 vjeç. I plagosuri ndodhet i shtruar në Spitalin Rajonal Vlorë, jashtë rrezikut për jetën.
Nga hetimet e para rezulton se shtetasi K. Xh. ka përdorur automjetin e tij për të larguar nga vendi i ngjarjes autorin e dyshuar F. B., ndërsa shtetasi E. H. ka larguar automjetin e këtij të fundit.
Të tre të shpallurit në kërkim janë banues në Vlorë. Policia po punon për kapjen e tyre dhe dokumentimin e plotë të rrethanave të ngjarjes.