Një ngjarje e rëndë është regjistruar pak para mesnatës së të premtes në Athinë, ku një 10-vjeçare shqiptare mbeti e plagosur pas një sulmi me armë zjarri ndaj kafenesë “Amora” në rrugën “Agorakritou” nr. 32. Autorët, katër persona të armatosur, qëlluan në drejtim të fasadës së lokalit ku ndodheshin 10 klientë, të gjithë shtetas shqiptarë. E mitura, vajza e pronarit të kafenesë, u godit në këmbën e majtë dhe u dërgua me urgjencë në spitalin pediatrik, ku ndodhet jashtë rrezikut për jetën. Autoritetet po përcaktojnë nëse lëndimi është shkaktuar drejtpërdrejt nga një plumb apo nga copëza të shkaktuara nga të shtënat.
Hetimet për këtë ngjarje i ka marrë përsipër Departamenti i Shantazheve i Drejtorisë për Luftën kundër Krimit të Organizuar. Policia greke zbuloi se pronari i lokalit rezulton me precedentë penalë, pasi ka qenë i burgosur për çështje të paligjshme dhe një tentativë vrasjeje, për të cilën u lirua në vitin 2021. Si pasojë, hetuesit janë duke përqendruar vëmendjen në pistën e një konflikti personal të pronarit, si dhe po shqyrtojnë mundësinë e përfshirjes së një shtetasi tjetër shqiptar që ndodhet aktualisht në burg.
Në lidhje me autorët e sulmit, forcat e rendit gjetën një automjet të djegur në zonën e Aspropyrgos, i cili dyshohet se është përdorur gjatë arratisjes. Brenda mjetit, policia gjeti një armë automatike tip kallashnikov, e cila është dërguar për analiza balistike me shpresën se do të zbardhë lidhjen e saj me sulmin. Ndërkohë, policia vazhdon shqyrtimin e pamjeve të kamerave të sigurisë përgjatë rrugës që përshkruan autorët për të bërë të mundur identifikimin dhe kapjen e tyre.
Përditësime
Hetimet për atentatin kaluan nën kompetencën e Drejtorisë për Luftën kundër Krimit të Organizuar pas gjetjes së një kallashnikovi në automjetin e djegur.