Ngjarja ka ndodhur mbrëmjen e kaluar në një zonë bujqësore në fshatin Vajkal, Bulqizë. Sipas hetimeve paraprake, shtetasi A. Çupi, 51 vjeç, ka hapur zjarr me një armë gjahu tip çifte, pasi dyshoi se në parcelën e tij kishin hyrë kafshë të egra që po dëmtonin të mbjellat.
Pas të shtënave, u konstatua se ishte goditur me saçme 57-vjeçari Naxhi Bici, i cili ndodhej në atë kohë duke vaditur tokën e tij. I plagosuri mori ndihmën e parë në Spitalin e Bulqizës dhe më pas u transferua për trajtim më të specializuar në Spitalin e Traumës në Tiranë. Sipas burimeve mjekësore, ai ndodhet jashtë rrezikut për jetën.
Shërbimet e Policisë së Bulqizës kanë mbërritur në vendin e ngjarjes për kryerjen e veprimeve procedurale. Arma e gjahut është sekuestruar në cilësinë e provës materiale, ndërsa grupi hetimor po vijon verifikimet për zbardhjen e plotë të rrethanave të këtij incidenti.