Policia e Shtetit ka bërë të ditur se gjatë tubimit të zhvilluar ditën e mërkurë pranë godinës së Parlamentit, një grup protestuesish kanë kundërshtuar punonjësit e rendit dhe kanë hedhur sende të forta e mjete piroteknike drejt tyre. Ngjarja, e cila nisi rreth orës 09:30, solli përplasje fizike ku mbetën të lënduar 6 efektivë, të cilët morën ndihmën e nevojshme mjekësore në spital.
Pas hetimeve, policia identifikoi 32 pjesëmarrës të përfshirë në veprimet e kundërligjshme. Dy prej tyre, shtetasit O. P. (41 vjeç) dhe A. I. (44 vjeçe), u arrestuan në flagrancë, ndërsa për 30 shtetas të tjerë ka nisur procedimi në gjendje të lirë. Policia sekuestroi si provë materiale një sasi kapsollash, të cilat u gjetën në posedim të shtetases A. I.
Personat e përfshirë në këtë ngjarje akuzohen për një sërë veprash penale, si:
• Pengimi i qarkullimit të mjeteve të transportit
• Prishja e qetësisë publike
• Organizimi dhe pjesëmarrja në grumbullime dhe manifestime të paligjshme
• Kundërshtimi i punonjësit të Policisë së rendit publik
• Goditja për shkak të detyrës
• Shkelja e rregullave mbi lëndët plasëse dhe djegëse
Materialet procedurale janë dërguar për ndjekje të mëtejshme pranë Prokurorisë për dokumentimin e plotë të ngjarjes.
Përditësime
Policia e Shtetit ka arrestuar Orion Peçin dhe Artemisa Islamajn në lidhje me dhunën e ushtruar gjatë protestës 8-orëshe pranë Parlamentit. Sipas hetimeve:
- Orion Peçi akuzohet për hedhjen e kapsollave që shkaktuan plagosjen në kokë të një efektivi policie.
- Artemisa Islamaj dyshohet për organizimin e shpërndarjes së mjeteve piroteknike.
Përplasjet midis protestuesve dhe forcave të rendit vijuan me ndërprerje gjatë gjithë ditës.