Policia e Kosovës, gjatë një patrullimi në fshatin Radosevikë të komunës Zubin Potok, rreth orës 00:55 ndërmjet të martës dhe të mërkurës, kontrolloi një shtëpi të pabanuar. Aty gjeti dhe konfiskoi një armë zjarri AK-47, dy karikatorë – prej të cilëve një i mbushur me 27 fishekë –, dy fishekë gjuetie si dhe pajisje ushtarake të tjera.
Pas konfirmimit të pronarit të shtëpisë, me urdhër të prokurorit u krye bastisje edhe në banesën e tij tjetër në Zubin Potok. Në këtë shtëpi u gjet një armë tjetër AK-47 dhe katër karikatorë me gjithsej 120 fishekë.
I dyshuari, një serb, u shoqërua në stacionin policor ku u intervistua. Me vendim të prokurorit, ai u dërgua në mbajtje. Rasti u regjistrua si "Armëmbajtje pa leje".
Këto operacione zhvillohen në kuadër të patrullimeve të vazhdueshme të policisë për luftimin e krimit të organizuar dhe shtrirjen e rendit ligjor në të gjithë Kosovën.