Operacioni policor është zhvilluar në tri lokacione të ndara, ku forcat e rendit gjetën dhe sekuestruan materiale të dyshuara ushtarake. Sipas njoftimit zyrtar, kontrollet u zhvilluan në shtëpi të pabanuara rreth orës 02:00 të së dielës.
Në shtëpinë e parë janë gjetur dhe konfiskuar 432 fishekë të kalibrit 7.62 mm dhe 18 fishekë të një kalibri të panjohur. Në lokacionin e dytë, policia sekuestroi 204 fishekë të kalibrave të ndryshëm, 56 gëzhoja, një bajonetë, një maskë ushtarake dhe tri pajisje ushtarake për ushqim. Ndërkaq, në shtëpinë e tretë u gjetën një pushkë ajrore, 31 fishekë dhe disa para të vjetra me origjinë jugosllave.
Lidhur me të gjitha rastet është njoftuar prokurori kompetent dhe janë iniciuar procedurat hetimore për veprën penale "Mbajtje në pronësi, kontroll ose posedim të paautorizuar të armës". Njësitë relevante të Policisë së Kosovës po punojnë për të sqaruar origjinën e pajisjeve të gjetura dhe për të identifikuar personat e përfshirë në këtë veprimtari të kundërligjshme. Këto kontrolle janë pjesë e operacioneve të shpeshta që po zhvillohen kohët e fundit në veri të vendit për gjetjen e armatimeve të padeklaruara.