Drejtoria Rajonale e Policisë në Mitrovicën e Veriut ka zhvilluar një operacion pas informatave të marra nga qytetarët, duke kryer kontrolle në tri lokacione të ndryshme në komunën e Zubin Potokut.
Në fshatin Presek, njësitë policore zhvilluan dy aksione të ndara në objekte që shërbenin si stalla për bagëti, ku u gjetën dhe u sekuestruan:
- Rasti i parë: 1 pushkë M48, 5 karikatorë të kalibrit 7.62 mm, 151 fishekë 7.62 mm, pjesë të uniformës së kamufluar dhe bateri ndriçuese.
- Rasti i dytë: 1 pushkë M48, 74 fishekë për pushkën M48 dhe 254 fishekë të kalibrit 7.62 mm.
Në rastin e tretë, të zhvilluar në një objekt të pabanuar në fshatin Qeçevë, policia konfiskoi:
- 1 pushkë M48 me bajonetë;
- 11 fishekë për pushkën M48 dhe 33 fishekë 7.62 mm;
- Dy makina për mbushjen e fishekëve të armëve të gjuetisë;
- Rreth 200 gramë barut dhe 2 kilogramë sfera metalike.
Sipas njoftimit zyrtar, të gjitha veprimet janë ndërmarrë në koordinim me Prokurorin e Shtetit. Rasti është iniciuar si "mbajtje në pronësi, kontroll ose posedim të paautorizuar të armëve". Aktualisht, autoritetet nuk kanë raportuar për persona të ndaluar, ndërsa hetimet mbeten në vijim.
Përditësime
Policia e Kosovës ka zgjeruar operacionin për sekuestrimin e armatimeve të paligjshme në veri, duke kontrolluar një zonë malore pranë kufirit me Serbinë. Në orën 19:00, njësitë speciale ushtruan kontroll në fshatin Qeçevë, në kuadër të hetimeve të vazhdueshme pas sulmit në Banjskë të vitit 2023.