Policia e Kosovës ka kryer një aksion në fshatin Varagë të komunës Zubin Potokut, ku ka sekuestruar armatim të paligjshëm në një shtëpi të pabanuar. Ngjarja ka ndodhur më 21 mars 2026 rreth orës 11:55, gjatë një patrullimi dhe kontrolli rutinë.
Gjatë kontrollit, zyrtarët policorë kanë gjetur dhe konfiskuar një armë automatike të tipit AK-47 bashkë me pesë karikatorë të mbushur, që përmbanin gjithsej 68 fishekë. Po ashtu, u sekuestruan dy uniforma kamufluara dhe pajisje për pastrimin e armëve.
Në vendin e ngjarjes u gjet edhe një granatë dore, e cila u tërhoq në mënyrë të sigurt nga njësiti për deminim (EOD).
Lidhur me rastin u njoftua prokurori kompetent. Hetimet vazhdojnë për të zbardhur rrethanat, origjinën e armatimit dhe përgjegjësit e mundshëm.