Gjatë ditës së sotme, Policia e Kosovës, përmes Drejtorisë për Bashkëpunim Ndërkombëtar Policor, ka kryer dy operacione të ndara për sjelljen në vend të dy shtetasve të kërkuar nga drejtësia. Operacionet janë realizuar në koordinim të ngushtë me institucionet e drejtësisë dhe njësitet përkatëse policore.
I dënuari i transferuar nga Shqipëria ishte dënuar për veprën penale të “trafikimit të armëve dhe municionit në bashkëpunim”, sipas Kodit Penal të Republikës së Shqipërisë. Personi në fjalë kishte vuajtur një pjesë të dënimit në shtetin shqiptar dhe është dorëzuar pranë Shërbimit Korrektues të Kosovës për të vuajtur pjesën e mbetur.
Në një operacion të dytë të zhvilluar po këtë ditë, autoritetet kanë ekstraduar nga Gjermania një shtetas kosovar, i cili ishte subjekt i një urdhër-arresti ndërkombëtar. I dyshuari, që akuzohet për veprën penale të “dhënies së ndihmës kryesve pas kryerjes së veprave penale”, i është dorëzuar njësiteve të Drejtorisë Rajonale të Policisë në Gjakovë për procedura të mëtejshme ligjore.