Policia e Kosovës ka realizuar dy ekstradime në bashkëpunim me autoritetet e Shqipërisë dhe Zvicrës. Sipas njoftimit zyrtar, më 27 gusht 2026, shtetasi kosovar H.M. është ekstraduar nga Kosova drejt Shqipërisë, pasi ndaj tij ishte lëshuar një urdhërarrest ndërkombëtar nga institucionet e drejtësisë shqiptare për veprën penale “Vjedhja e rëndë”. Ky ekstradim u krye në pikëkalimin kufitar të Vërmicës, ku i dyshuari iu dorëzua autoriteteve përkatëse për procedurat e mëtejshme.
Ndërkaq, më 28 gusht 2026, një tjetër operacion ka rezultuar me ekstradimin e shtetasit kosovar P.S. nga Zvicra për në Kosovë. I dyshuari kërkohej nga organet e drejtësisë kosovare për veprën penale “Lëndim i rëndë trupor”. Ai mbërriti në Kosovë përmes Aeroportit Ndërkombëtar “Adem Jashari”, ku më pas iu dorëzua njësive të Stacionit Policor në Viti.
Drejtoria për Bashkëpunim Ndërkombëtar Policor (ILECU), në kuadër të Policisë së Kosovës, konfirmoi se këto veprime janë ndërmarrë në bashkëpunim me institucionet vendore dhe ato ndërkombëtare. Ky bashkëpunim synon luftimin e kriminalitetit dhe lokalizimin e personave të shpallur në kërkim ndërkombëtar.