Policia e Kosovës ka gjetur dhe sekuestruar armë dhe municion në një shtëpi të braktisur në fshatin Jashanicë të Komunës Leposaviq, në veri të Kosovës, më 5 mars 2026.
Gjatë kryerjes së detyrave të rregullta policore në rajonin verior, policia ka pranuar informacion se në këtë lokacion mund të gjendeshin armë. Pas kësaj, njësitë relevante kanë dalë në vend dhe kanë kryer kontrollin.
Gjatë kontrollit janë sekuestruar:
- 1 pushkë karabin e tipit M48;
- 1 armë AK-47;
- 1 pushkë gjuetie;
- 1 pistoletë CZ me dy karikatorë të zbrazët;
- 128 fishekë të kalibrave të ndryshëm.
Në lidhje me rastin është njoftuar Prokurori i Shtetit, i cili ka udhëzuar inicimin e procedurës penale për “Mbajtje në pronësi, kontroll ose posedim të paautorizuar të armëve”. Deri tani nuk ka persona të arrestuar, ndërsa rasti mbetet nën hetime.
Policia e Kosovës ka falënderuar qytetarët për bashkëpunimin dhe i ka ftuar të raportojnë çdo informacion në numrin 192 për të ruajtur rendin dhe sigurinë publike.