Gjatë javës së kaluar, Policia Rajonale e Prishtinës ka zhvilluar një sërë aksionesh në lokacione të ndryshme, duke u përqendruar në zbatimin e urdhëresave të gjykatës dhe rritjen e sigurisë publike. Në total janë realizuar 228 urdhëresa, ku 52 prej tyre kanë qenë të lidhura me vepra penale, ndërsa pjesa tjetër ka përfshirë seanca gjyqësore, kundërvajtje dhe verifikime të ndryshme procedurale.
Në kuadër të veprimeve policore, personat e dënuar me burgim janë dërguar për vuajtjen e dënimit, ndërsa ata që kanë qenë të dënuar me gjobë janë liruar pas shlyerjes së obligimeve të tyre ligjore. Paralelisht me këto masa, policia ka bërë të mundur sekuestrimin e 13 armëve të zjarrit të kalibrave dhe llojeve të ndryshme.
Sektori i trafikut ka shënuar gjithashtu aktivitet të shtuar, ku në përputhje me ligjin janë shqiptuar 4,416 masa administrative. Pjesa më e madhe e këtyre gjobave është vendosur për shkelje të rregullave të komunikacionit. Përdorimi i pajisjeve të avancuara, si veturat inteligjente dhe radarët mobilë, ka mundësuar evidentimin e 688 shkeljeve gjatë kësaj periudhe.
Policia Rajonale e Prishtinës ka njoftuar se do të vazhdojë angazhimin me aktivitete të shtuara për parandalimin e veprave penale, me qëllim forcimin e sigurisë për qytetarët dhe sigurimin e zbatimit të ligjit në të gjithë territorin e rajonit.
Përditësime
Policia Rajonale e Prishtinës ka përditësuar bilancin operacional për javën e fundit, duke korrigjuar shifrat e publikuara më parë:
• 15 armë të sekuestruara (nga 13 të raportuara), ku 11 prej tyre u konfiskuan gjatë ahengjeve familjare;
• 128 urdhëresa gjyqësore të realizuara (nga 228);
• 3,759 gjoba administrative të shqiptuara (nga 4,416);
• 565 shkelje të identifikuara përmes pajisjeve inteligjente (nga 688).